|
О всехвальный и всечестный архиерею, града нашего и всея земли
Воронежския небесный заступниче, святителю Антоние!
Ты на земли живый, небеснаго гражданина и
земнаго ангела образ нам собою показал еси: издетска бо возраста
смирением украсился еси, и страх Божий, еже есть всякой премудрости
начало, в сердце твоем стяжал еси. Ты суету мирскую отринув, во
ангельский образ облеклся еси, и в Дому Богородицы - лавре Печерстей
вселився, постом и послушанием и трудами многими страсти плотския
препобедил еси.
Того ради от Владыки Христа избран быв, сана святительскаго
сподобляешися, и аки светильник пресветлый на свещнице кафедры
Воронежския поставляешися. Како восхвалити возможем кротость и незлобие
твое, отче Антоние, еще же к нищим милосердие неоскудеваемое, к служению
церковному ревность и благоговение, и о всякой душе христианской
пастырское, с любовию, попечение! Молитвою своею теплою град наш от
моровой язвы защитил еси, и благодатию Христовою, в тебе живущею,
болящим здравие подавал еси.
Таковыя многия подвиги благочестия совершая, словом и житием, любовию,
верою и чистотою, великим угодникам Божиим сродник духовный показался
еси: сам бо Серафим преподобный духовным своим братом и великим
архиереем Божиим тя нарече. Ты бо, святителю, не на своя силы полагался
еси, но к помощи и заступничеству святых Божиих прибегал еси. За сие
усердие удостои тя Господь прославление Митрофана святителя всерадостно
совершити и нетленныя мощи Тихона святителя лицезрети.
Мы же ныне, чада твоя, отче святителю Антоние, у твоея честныя иконы
ныне предстояще, яко достойнаго тех преемника и равночестное тем светило
благодатное земли нашей восхваляем тя. Покрый и защити град сей и всю
страну нашу и люди живущия от глада и болезней, от нашествия супостат и
междоусобныя брани, от всякия беды и внезапныя смерти. Погибельныя ереси
посрами; чарования демонская разори.
Ты сам носитель мирнаго духа быв, мир озлобленному миру нашему испроси;
в скорбех - терпение даруй; в радости и благоденствии - Бога всещедраго
благодарити научи нас. Всем же нам даруй разум светел, во еже единаго на
потребу к жизни вечной искати, и распятаго за ны Христа Господа
возлюбити, и непостыдно на Страшнем Судищи Его одесную стати купно с
тобою и всеми святыми, от века Ему благоугодившими.
Аминь.
|
