главная

СВЯТЫЕ

ПОДВИЖНИКИ БЛАГОЧЕСТИЯ

Акафист преподобному Илариону, затворнику Троекуровскому*


Кондак 1

Избранный угодниче Христов Иларионе, / достославне затворниче, старче и чудотворче, / величающе прославльшаго тя Господа, / умиленное сие пение тебе приносим, / свобождения от бед и напастей о тебе испрошающи, / верою и любовию восхваляем тя, зовуще: Радуйся, преподобне Иларионе, Троекуровский чудотворче.

Икос 1

Ангелом уподобился еси, преподобне, плотию еще на земли пожив; духом бо выну горе воспаряя, безстрастия безплотных достигл и дарами Святаго Духа преисполнился еси. Житию же твоему богоугодному подражати хотяще, во умилении вопием ти: Радуйся, в житии точию Бога взыскавый; Радуйся, невозвратно Христу последовавый. Радуйся, Святаго Духа сосуде избранный; Радуйся, Святыя Троицы слуго неукорный. Радуйся, святильниче веры и благочестия; Радуйся, образе кротости и воздержания. Радуйся, безстрастия высото; Радуйся, смиренномудрия глубино. Радуйся, ангеле земный и человече небесный; Радуйся, к Богородице наш теплый ходатаю. Радуйся, Царя Славы рабе благий и верный; Радуйся, вшедший в радость Господа твоего. Радуйся, преподобне Иларионе, Троекуровский чудотворче.

Кондак 2

Видящи в тебе будущаго славы Божия ревнителя, еще отроком изведе тя Господь из дому отчаго к престарелому сроднику твоему, у негоже в послушании духом возрастая, велие усердие к посту, молитве и храму Божию показа, чистыми детскими усты славя Богу: Аллилуия.

Икос 2

Разумом в горнем пребывая, святый отче, повинующися родителема в супружество вступи, обаче в нем, Алексию Человеку Божию подражая, девство безпорочное и чистоту душевную явил еси, имаже удивляющеся воспеваем ти похвальная: Радуйся, Бога единаго возлюбивый; Радуйся, все упование Нань возложивый. Радуйся, от утра жизни Ему поработавший; Радуйся, измлада себе для страстей распявший. Радуйся, чистоты усердный хранителю; Радуйся, девственниче душею и телом. Радуйся, вся красная мира презревый; Радуйся, похоть плоти и очес умертвивый. Радуйся, яко и жену к девственной жизни склонял еси; Радуйся, яко в том не успев, дом твой оставил еси. Радуйся, житию в чистоте поспешниче; Радуйся, в плотских бранех споборниче. Радуйся, преподобне Иларионе, Троекуровский чудотворче.

Кондак 3

Силою свыше оболкийся, крепость яви противу искушений от мира, плоти и диавола, сильне на тя воюющих, поколебати же не могущих. Всего же себе в руце Божии вверяя, во граде Киеве от угодников Печерских в монастырь ити благословение приял еси, желая тамо до конца сея временныя жизни пети Богу: Аллилуия.

Икос 3

Имущи богатство терпения, горнило искушений прошел еси, преподобне: убо чрез жену твою и братию монашескую, твоему высокому жительству завидящих и ложно тя оклеветавших, попусти Всеблагий Господь изгнание тебе из обители, егоже с незлобою претерпев, слышиши похвалы сия: Радуйся, терпением Ангелов удививый; Радуйся, блаженство кротцых стяжавый. Радуйся, яко лжу и изгнания подъял еси; Радуйся, яко мзда твоя многа на Небесех. Радуйся, клевету и глумления простивый; Радуйся, молящийся за гонителей твоих. Радуйся, в изгнании не имый, где главы подклонити; Радуйся, в скитаниих укрепляемый Духом Святым. Радуйся, непрестанней молитве время посвятивый; Радуйся, в хладных пещерах райскую сладость вкусивый. Радуйся, многими скорбьми в Царствие Божие шедший; Радуйся, в терпении научаяй стяжати души наша. Радуйся, преподобне Иларионе, Троекуровский чудотворче.

Кондак 4

Бурю новых гонений воздвиже на тя злобный ратник, древний завистник, и паки со всяким смирением ты убо, Иларионе блаженне, с места на место преселялся еси, удаляющися от гонителей и паки водворяяся в пустыни, Богу же непрестанную хвалу воздая, поющи: Аллилуия.

Икос 4

Слышаще святое житие твое, достославне Иларионе, и видяще, яко о мнозих дивных подвизех поревновал еси, искушения за сие претерпевая жестокая, удивляхуся людие тебе, славяще Бога, дивнаго во святых Своих. Такожде и мы любовию восхваляем тя, отче, и вопием ти сице: Радуйся, в искушениих непоколебиме столпе; Радуйся, в бедствиих великодушия хранителю. Радуйся, тверду веру в Промысл Божий питающий; Радуйся, благодеющу руку Божию во всем зрящий. Радуйся, в посте и бдении подвижниче неослабный; Радуйся, в трудех и подвизех течение совершивый. Радуйся, пустынножительство возлюбивый; Радуйся, во плоти аки безплотен явльшийся. Радуйся, воине Христов непобедимый; Радуйся, сокрушителю козней демонских. Радуйся, паче снега скорьбми убеливыйся; Радуйся, яснее злата искушена сияющий. Радуйся, преподобне Иларионе, Троекуровский чудотворче.

Кондак 5

Божественная дарования многоразлична улучив, смирение глубокое наипаче возлюби, блаженне отче; памятуя же немощь человеческаго естества и Петрово отречение поминая, алектора в пещере твоей держа, по крику его на нощную молитву вставаше, радостне взывати Богу: Аллилуия.

Икос 5

Видев преподобный житие сие яко сень мимоходящее и якоже соние востающаго исчезающее, точию о жизни будущаго века прилежа. Темже с радостию и благодарением неисчетныя скорби и болезни понесе, мысленне страсти Христовы созерцая. Мы же, безстрастию его дивящеся, хвалебное пение приносим: Радуйся, Христа распятого выну пред собою предзревый; Радуйся, сораспявыйся Ему со страстьми и похотьми. Радуйся, яко взем крест, Христа последовал еси; Радуйся, яко на высоту добродетелей возшел еси. Радуйся, о всем Творца благодаривый; Радуйся, многими венцы преукрашенный. Радуйся, болезней ярем с радостию понесший; Радуйся, духовную силу в немощех явивый. Радуйся, смирением душу одеявый; Радуйся, препоясавшийся долготерпением. Радуйся, орле, в молитве небопарний; Радуйся, голубе, мир душевный стяжавый. Радуйся, преподобне Иларионе, Троекуровский чудотворче.

Кондак 6

Проповедник воистину благочестия явился еси, угодниче Христов, яко на всяк день Божественную Литургию посеща, духовныя силы частым приобщением Святых Христовых Таин укрепляя, по причащении же светился еси, славяще распеншагося за ны Христа: Аллилуия.

Икос 6

Возсия в тебе дивный чудотворец, егда затворнице Мелании Елецкой, тя видети хотящей, яве на Пасху явился еси, в тоежде время у супруг боголюбивых быти не престая, яковому чуду о тебе бывшему дивящеся, тии вси воспеша тебе таковая: Радуйся, доме, на камени основанный; Радуйся, храмино, украшенная добродетельми. Радуйся, столпе благочестия непоколебимый; Радуйся, источниче чудес неистощаемый. Радуйся, церковного богослужения любителю; Радуйся, благолепия храмов рачителю. Радуйся, яко видения Богоматери сподобился еси; Радуйся, яко елеем от Ея иконы изцелял еси. Радуйся, на сусе месте студенец изведый; Радуйся, целительну в том воду явивый. Радуйся, заповедей Господних блюстителю верный; Радуйся, достойный сосуде Божия благодати. Радуйся, преподобне Иларионе, Троекуровский чудотворче.

Кондак 7

Хотяй безмолвие молитвенное улучити, не имяше покоя и на малое время от множества людей, к тебе приходящих, преподобне, яко и на древе для умного делания принужден бе скрыватися, идеже дние и нощи в молитве и посте пребываше, аки райская птица поя Богу: Аллилуия.

Икос 7

Новаго видевше тя избранника Божия, благодатныя дары изобильно стяжавшаго во еже души и телеса изцеляти, дуси нечистии изгоняти и коемуждо благая ко спасению подавати, издалече притекаху к тебе людие и взываху ти благодарне таковая: Радуйся, врачу скоромилостивый; Радуйся, сострадателю в скорбех. Радуйся, изцеление в болезнех; Радуйся, утешение в печалех. Радуйся, советниче прозорливый; Радуйся, ходатаю наш ко спасению. Радуйся, воли Божия возвещение; Радуйся, помощи Божия источниче. Радуйся, желаемых благих насадителю: Радуйся, злобных духов прогонителю. Радуйся, яко ослабевшия духом укрепляеши; Радуйся, яко веру оскудевающую восполняеши. Радуйся, преподобне Иларионе, Троекуровский чудотворче.

Кондак 8

Странник и пришлец быв на земли, преподобне, тесным и тернистым путем в Небесное Отечество шествова и другим сей путь освеща отеческим наставлением и руководством спасительным, всем к тебе прибегающим, научая их Бога славити всем сердцем: Аллилуия.

Икос 8

Весь в горнем умом пребыва, преподобне, и нас, суетою омраченных, не оставляше любовию своею. Извещение же от Господа получивше, вселился еси в Троекурово, идеже до конца своих дней бе служа Богу и ближним. Сего ради приими от нас благохваления сия: Радуйся, затворниче, благодатию осиянный; Радуйся, мудре старче, верныя окормляяй. Радуйся, немощей милосердый целителю; Радуйся, сущим в бедах помощниче. Радуйся, вдовиц и сирых питателю; Радуйся, скудным земледельцем вспоможение. Радуйся, яко дожди молитвою низводил еси; Радуйся, яко богатии урожаи тем даровал еси. Радуйся, скорбных ободрение, странных питателю; Радуйся, в темницах сущих посетителю. Радуйся, гражданине Горняго Иерусалима; Радуйся, благословенный Отца Небеснаго. Радуйся, преподобне Иларионе, Троекуровский чудотворче.

Кондак 9

Всех вопрошающих тя любовию назидал еси, добрый путь ко спасению указющи, темже и преподобного Амвросия, еще безвестна мирянина суща, в Оптину пустынь направил еси, пророчески великаго в нем старца провидя, благословяща Бога: Аллилуия.

Икос 9

Ветии красноречивыя видим посрамленныя о благодати словес твоих, богомудре Иларионе, яко коемуждо из притекающих за советом к тебе полезная ко спасению подавал еси, волю Божию о человеке возвещая. Разсуждение же твое богомудрое похваляя, тако вопием ти: Радуйся, право стоящим утверждение; Радуйся, заблуждшим кроткое исправление. Радуйся, словесы благодати верных питаяй; Радуйся, дальняя яко ближняя созерцаяй. Радуйся, грядущая яко настоящая провидевый; Радуйся, тайных дел обличителю прозорливый. Радуйся, страждущим утешение; Радуйся, в испытаниих вспоможение. Радуйся, яко затворника от искушения охранил еси; Радуйся, яко паучину, сети вражия разорил еси. Радуйся, луче вечнаго Солнца правды; Радуйся, свеще, святою любовию горящая. Радуйся, преподобне Иларионе, Троекуровский чудотворче.

Кондак 10

Спасительное в тебе прибежище обретоша собравшиися окрест тебе сестры боголюбивыя, в монашестве подвизатися хотящия, имже ты, преподобне Иларионе, предрекл еси на месте сем святей обители быти, выну боголюбицам отеческую любовь и заботу являше, подвизая всех пети Богу: Аллилуия.

Икос 10

Стена ограждения явился еси агницам избраннаго стада Христова не точию при жизни, но и по блаженней кончине твоей, яко и воздвигнутое на них от властей гонение небесным твоим предстательством угасил еси, и община вскоре утвердися. Выну помощь и заступление твое приемлющи, сице тя славяху духовная чада твоя: Радуйся, Агнца Божия дивный избранниче; Радуйся, Пастыреначальника верный помощниче. Радуйся, словесных овец окормление; Радуйся, мысленных волков отгнание. Радуйся, в страсе Божием жити научающий; Радуйся, малодушныя и немощныя укрепляющий. Радуйся, многопопечительность искореняяй; Радуйся, прилоги к тщеславию посецаяй. Радуйся, чистых душ Христу невестителю; Радуйся, добрый пестуне на пути ко спасению. Радуйся, сопричастниче мудрым девам; Радуйся, светильниче, елеем изобилуяй. Радуйся, преподобне Иларионе, Троекуровский чудотворче.

Кондак 11

Пение непрестанное Господу Иисусу вознося, достигл еси жития твоего скончания, преподобне; духом бодр бяше, плотию же паче и паче изнемога, яко не возмощи тебе в храм Божий ходити, ни приходящих к тебе приимати, чрез келейника сим отвещавая, да не без утешения отыдут. Знамение же видимое приближения кончины твоея от Бога улучив, воспе Ему: Аллилуия.

Икос 11

Светоподательный светильник быв в житии, и по преставлении твоем не оставляеши нас, преподобне: обитель устрояя, просящим помогая, неверующих в святость твою в сониих кротко вразумляя. Безбожну же лихолетию скончавшуся, и обитель твоя возродися, и яви нам Господь мощи твоя благоуханныя, к нимже вернии притекающе, с любовию взывают ти сице: Радуйся, светлыми ризами украшенный; Радуйся, в Царский чертог вошедший. Радуйся, славы присносущныя причастниче; Радуйся, света неизреченнаго зрителю. Радуйся, яко душею в Небесныя обители вселился еси; Радуйся, яко мощи многоцелебныя нам оставил еси. Радуйся, упование наше непостыдное; Радуйся, надежды нашея утверждение. Радуйся, яко мнозим и по смерти являлся еси; Радуйся, яко изображение твое пожар угасило есть. Радуйся, крине пустыннаго прозябения; Радуйся, класе стократ плод принесший. Радуйся, преподобне Иларионе, Троекуровский чудотворче.

Кондак 12

Благодатнаго тя пред Богом предстателя сведуще, прилежно молим ти ся, отче святый: не престай молящи Христа Бога, да свободит державу нашу от нашествия духовнаго иноплеменников, от тлетворных иноземных обычаев, от безбожия и нищеты, да спасение тем улучивше, поем тобою благодеющему нам Богу: Аллилуия.

Икос 12

Поющи с радостию и любовию твое прославление, преподобне Иларионе, восхваляем тя, яко многомощнаго молитвенника о нас пред Богом, скораго помощника всем с верою у тебе просящим, ограждение же необоримое от всяких бед и напастей, и верно взываем ти: Радуйся, Престола Всевышняго предстоятелю; Радуйся, о мире всего мира молитвенниче. Радуйся, врагов Отечества одоление; Радуйся, войску русскому вспоможение. Радуйся, тяжце недугующих изцелителю; Радуйся, одержимых бесы врачевателю. Радуйся, имже житейския нужды разрешаются; Радуйся, имже благодатная помощь подается. Радуйся, всяко благополезно прошение исполняющий; Радуйся, яко всем чтущим тя поспешествуеши. Радуйся, Царствия Божия достойный сонаследниче; Радуйся, яко подвизатися того ради и нас научаеши. Радуйся, преподобне Иларионе, Троекуровский чудотворче.

Кондак 13

О, пречудный угодниче Божий, преподобне отче Иларионе! Приими моление сие малое, от усердия тебе приносимое, и умоли Господа Славы, да не осудит нас Праведный Судия во огнь геенский, но Своего Царствия вечнаго да сподобит, в жизни грядущей пети Ему: Аллилуия, Аллилуия, Аллилуия.  
(Этот кондак читается трижды, затем икос 1 и кондак 1)
 
Молитвы преподобному Илариону, затворнику Троекуровскому

Молитва первая

О священная главо, преблаженне отче Иларионе! Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли, отче священный, за ны, дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя. Поминай нас недостойных у Престола Вседержителя, и не престай моляся о нас ко Христу Богу: яко дана тебе благодать молитися за ны. Не мним бо тя мертва суща: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския, и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со Ангельскими воинствы, со безплотными лики, достойно веселится. Ведущи убо тя и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да явимся со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым, и Благим, и Животворящим Его Духом, ныне и присно, и во веки веков. Аминь.

Молитва вторая

О, предивный угодниче Божий, преподобне и Богоносне отче наш Иларионе, Троекуровский затворниче и чудотворче, земли Липецкия славо и похвало! Чрез все житие твое неуклонно Богу последовав, любве ради к Нему мнози подвизи, скорби и болезни понесл еси и еще на земли храм честен Святаго Духа чистотою души твоея соделался еси. Темже дар рассуждения и совета, дар прозорливости, дар изцеления и чудотворения еще в земной твоей жизни в изобилии от Господа приял еси. Ведуще велие твое пред Богом дерзновение, с верою и любовию к тебе притекаем и усердно молим тя: испроси у Господа Вседержителя миру умирение, жития христианскаго на Руси утверждение, от глада и пагубы избавление, душам же нашим спасение. Умоли Всещедраго Владыку, да угасит пламень страстей наших и низпослет росу благодати Своея на иссохшия сердца наша, да и мы молитвами твоими плод духовный принесем и сподобимся странствие земное непостыдно скончати и в Отечестве Небеснем часть со святыми улучити, да славим и поем Всесвятое имя Отца, и Сына, и Святаго Духа, во веки веков. Аминь.
 
Акафист предназначается для келейного чтения